Şavkat Mirziyoyev İslam İnkişaf Bankının prezidenti ilə görüş keçirib. Tərəflər Özbəkistanda iri layihələrin maliyyələşdirilməsi proqramı qəbul ediblər.
Şavkat Mirziyoyev və İslam İnkişaf Bankının (İİB) prezidenti Məhəmməd bin Süleyman Əl-Casirin danışıqları zamanı 1.6 milyard dollar dəyərində iri layihələrin maliyyələşdirilməsini nəzərdə tutan ayrıca proqram qəbul edilib.
Görüş Özbəkistan prezidentinin Səudiyyə Ərəbistanına səfəri çərçivəsində baş tutub. Dövlət başçısının mətbuat xidmətinin qeyd etdiyi kimi, bu, İİB ilə əlaqələrin keyfiyyətcə yeni səviyyəyə çıxarılması və 2023-2026-cı illər üçün ölkə əməkdaşlıq proqramının qəbulu istiqamətində mühüm addım olacaq.
“Bankın Daşkənddə tamhüquqlu nümayəndəliyinin fəaliyyətinin tezliklə təşkilinin, yeni maliyyələşdirmə alətlərinin tətbiqinin vacibliyi qeyd edilib”, - məlumatda deyilir.
Regional nəqliyyat infrastrukturu layihələri, Aral dənizi regionunda ekoloji proqramlar, o cümlədən İİB-in ayrıca trast fondunun dəstəyi ilə Əfqanıstana humanitar yardımın göstərilməsi və onun sosial-iqtisadi bərpası sahəsində əməkdaşlıq məsələləri ətrafında fikir mübadiləsi aparılıb.
"Report" xəbər verir ki, İslam dünyasının aparıcı maliyyə qurumlarının daxil olduğu, Bankın rəhbərlik etdiyi Ərəb Koordinasiya Qrupunun növbəti iclasının Daşkənddə keçirilməsi vaxtının nəzərdən keçirilməsi ilə bağlı razılıq əldə olunub.
Qeyd edildiyi kimi, hazırda Özbəkistanda İİB ilə birlikdə mənzil-kommunal infrastrukturun müasirləşdirilməsi, kənd yerlərinin inkişafı, səhiyyə, təhsil, su təsərrüfatı, sahibkarlıq və s., ümumilikdə 1.2 milyard dollarlıq layihələr həyata keçirilir.